АН-ын дарга, УИХ-ын гишүүн О.ЦОГТГЭРЭЛ: ЭХ ОРОНДОО ЭЛЭГ БҮТЭН САЙХАН АМЬДРАХСАН

Ардчилсан намын дарга, УИХ-ын гишүүн О.Цогтгэрэлд тус намын гишүүн, иргэн Т.Шинэхүү өөрийн Австрали улсад ажил хийх үеэрээ өмсөж байсан бээлийгээ дурсгал болгон хадгалуулахаар өчигдөр гардуулсан юм. Энэ талаар сошиал сүлжээнд шоглох элэглэх нь их байсан бол УИХ-ын гишүүн О.Цогтгэрэл дараах тайлбарыг хүргэлээ.

“Монгол залуус ажиллахаас илүү, сурч боловсрох гэж, амарч зугаалах гэж алсыг зорьдог байгаасай; идэр нас, хүсэл тэмүүллээ харь улсад барилгын талбайд битгий үрдэг байгаасай; энэ нийгмийг өөрчлөх хүч, сүүлийн найдвар Ардчилсан нам шүү” гэсэн захиастай Австрали улсад арматур зангидаж байсан залуугийн хөлс шингэсэн “дурсгалын бээлий”. Идэр насны, боловсрол, туршлагатай 300 мянган иргэн аргагүйн эрхээр Монголоос “дайжиж” хөлс, хөдөлмөрөө дуслуулж ахуй, амьдралаа зохицуулж, ар гэрээ авч явж байгаагийн нэг нь Т.Шинэхүү. Тэдний ихэнх нь эх орон, хайртай аав ээж, ахан дүүс, хань ижил, үр хүүхдүүдээсээ хол хүний нутагт, хүйтэн халуун хэцүү нөхцөлд хоолтой хоолгүй, өлсөж цангаж, хэзээ нэг өдөр эх орондоо буцна даа гээд л хөдөлмөрлөж байгаа. Үүнийг өөрчлөх гарц нь үндэстнээрээ БҮТЭЭДЭГ болж өөрчлөгдөх явдал. Монголчууд бид цөөхүүлээ. Уг нь идэр залуус нь харьд биеийн хүчний ажил хийж амь зуухаас илүүтэй эх орондоо оюун, мэдлэгээ зориулж, Монголдоо бүтээдэг, үйлдвэрлэдэг, экспортолдог болох ёстой. Иймдээ ч бид #ӨӨРЧИЛЬЕ #БҮТЭЭЕ үндэсний хөдөлгөөнөө эхлүүлсэн, эцсийг нь харна. Сонгуулиар харин харь руу урссан 200 мянган залуугийнхаа “хөлстэй бээлий”, “хүсэлтэй дэвтэр”, “хяслантай амьдрал”-аар ард түмнийхээ цөхрөлийг харуулсан “музейг” хамтдааа төв талбайдаа дэлгэж үзүүлье. Мянга мянган жирийн Монгол залуучуудын хөлс шингэсэн ажлын бээлийнээс ухаарал авсан хөгжлийн бодлогууд Ардчилсан намаас бэлтгэгдэнэ гарна. 🇲🇳🇲🇳🇲🇳 Монгол хүн Монголдоо сайхан амьдрах тэр цагийг цугтаа авчирцгаая.